Á ekki að bojkotta fleiri?

Bojkottum endilega Ísrael sem þrátt fyrir alla vankanta er eina landið á svæðinu með lýðræðislegt stjórnskipulag og réttarríki, þar sem fólk getur leitað til dómstóla ef því finnst á sér brotið. Og jú, fimmtungur Ísraela eru palestínskir arabar (ísraelskir ríkisborgarar, íbúar hernumdra svæða eru ekki meðtaldir í þessari tölu). Í Hæstarétti landsins situr m.a. ísraelskur arabi sem sendi fyrrverandi forseta landsins í fangelsi fyrir spillingu! Á þinginu, Knesset, sitja líka arabískir flokkar. Arabíska er annað opinbert mál Ísraels. 

Hins vegar eru núna öll arabaríkin "Judenfrei" eftir að hafa rekið samtals um eina milljón gyðinga frá heimilum sínum í ævilanga útlegð. 

Höldum svo áfram blómlegum viðskiptum við vinaþjóðir okkar eins og Sádi-Arabíu, ríkin við Persaflóa og Íran sem höggva höfuð, hendur og fætur af fólki, grýta konur eða hengja fólk á torgum þegar fólki sem valdhöfum mislíkar við er ekki hrint fram af björgum. Bætum tengslin við Hamas og Hisbolla sem stefna að ofangreindum stjórnarháttum fyrir íbúa sinna svæða samkvæmt Sharía lögum, en að útrýmingu Ísraels og íbúa þess. 

Reykjavík sniðgangi vörur frá Ísrael

Eru Bretar farnir að prenta evrur?

Á sama tíma og pylsusalinn úr Skagafirði reynir að ógilda ákvarðandir Alþingis með tölvupósti til Brussel, án þess að spyrja kóng né prest, hafa Bretar greinilega tekið upp evruna í skjóli myrkurs. Ekki vil ég rengja fréttaflutning Blaðsins sem hlýtur að vera kunnugt innstu kimum í íhaldsstjórnum beggja landa.

Frakkar enn sárir vegna Waterloo

Nei, fólkið var myrt, ekki tekið af lífi.

Ég veit að enskumælandi fréttastofur hafa þennan ósið að kalla glæpi gegn varnarlausu fólki executions (aftökur)en það þýðir ekki að íslensku blöðin þurfi að apa það upp í hverri fréttinni eftir aðra. ISIS, Al Kaída, Boko Haram o.s.frv. eru ekki ríki og geta ekki skipulagt aftökur. Þeir eru glæpahundar sem myrða fólk og það á að nefna hlutina réttu nafni. Aftökur eru nógu slæmar þar sem þær eru framkvæmdar eftir dómsúrskurði. En morð er morð.

Tóku 28 ferðamenn af lífi

Látin kona í viðtali við Mogga.

Annaðhvort er Morgunblaðinu ókunnugt um að Wenche Behring Breivik lést í mars síðastliðnum eða að Moggamenn hafa betri sambönd en aðrir fjölmiðlamenn. Í greininni er hvað eftir annað vitnað í orð sem konan hefði látið falla nú við útgáfu bókarinnar.

Fyrir mörgum árum komu norrænir blaðamenn hingað til lands og yrðu stórhrifnir þegar þeir sáu að stór hluti Morgunblaðsins var undirlagður af greinum um framliðna. Nefndu þeir því miðilinn "De dødes avis", þ.e. Blað hinna dauðu. Er það rökrétt, enda hafa núlifandi lesendur yfirgefið blaðið í hrönnum.

Trúði ekki að Breivik gæti framið slíkt ódæðisverk

Íslamistar eru ekki betri en nasistar.

Af einhverjum ástæðum virðast margir veigra sér við að gagnrýna íslamista fyrir það sem þeir predika og fremja. Þeir og þær sem eru til vinstri í pólitísku litrófi hika við að segja það sem blasir við: þessir menn eru fasistar og óvinir mannkyns.

Hvers vegna ætli það sé? Nú, í fyrsta lagi eru þeir brúnir eða svartir á lit og þar af leiðandi að sjálfsögðu skjólstæðingar vinstri manna. Nú kann einhver að segja: Fórnarlömbin hafa sama húðlit! En það er að sjálfsögðu ekki annað en útúrsnúningur.

Í öðru lagi eru óvinir þeirra hinir sömu og okkar: hinir djöfullegu Ísraelsmenn, (þ.e.a.s. gyðingar, en það segjum við ekki), og heimsveldi hins illa: Bandaríkin.

Nú er það því miður svo að þeir fyrstu sem íslamistar ráðast á, ofsækja, pynta og drepa eru femínistar, lýðræðissinnar, hommar; allir sem aðhyllast nútímalegt samfélag byggt á vísindum, mannúð, menntun og lýðréttindum. Hvers vegna í ósköpunum eru vestænir vinstir menn ekki í forystusveit þeirra sem berjast gegn íslamó-fasistunum??????

Skutu á sofandi ungmenni á heimavist

Ömurlegt

Kann enginn að skammast sín í þessu kerfi okkar? Við erum opin gagnvart innflutningi fólks frá Norðurlöndum og síðustu tuttugu ár einnig frá löndum EES samningsins (Noregs, Sviss og Evrópusambandslanda). En heimurinn er mun stærri en þetta. Allir sem ekki eru frá EES löndum virðast mæta algerri hentistefnu og oftar en ekki mannfjandsamlegri framkomu hjá kerfinu. Vildum við vera meðhöndluð með þessum hætti ef við settumst að erlendis? Það sem þér viljið eigi að yður sé gjört, það skulið þið ei þeim gjöra.

„Hún bara gafst upp og fór“

Setjum lögbann á Bændablaðið og áróðurspésa LÍÚ!

Íslendingar sóttu um aðild að ESB, ekki öfugt. Í Brussel gera menn því ráð fyrir því að hérlendir hafi einhvern áhuga á að kynna sér aðild að klúbbnum. Aftur og aftur kemur í ljós hörmuleg fáfræði um það hvað ESB stendur fyrir og hvernig aðildarríki þess starfa saman að sínum málum. Aðildarsamningur Íslands liggur ekki fyrir og því er ekki hægt að kynna hann. Ríkisstjórnin getur ekki sagt hvað Íslendingum standi til boða fyrr en hann liggur fyrir, auk þess að vera klofin í málinu. Í raun er enginn að upplýsa fólk um það hvað ESB er.

Hins vegar er alla daga rekinn hræðsluáróður gegn ESB og þeim þjóðum sem þar starfa saman í Mogga, Útvarpi Sögu og Bændablaðinu. Moggalygin kostuð af LÍÚ-mafíunni en Bændablaðinu stýrt af landbúnaðarmafíu fyrir fé skattgreiðenda. Hvað ætli nei-sinnar segðu ef til stæði að læða landinu inn í þetta samband án upplýsinga eða umræðu? En þegar reynt er að koma staðreyndum til skila er gargað: landráð, þjóðníðingar, heimsendir! Og koma Evrópumál ekki öðrum við en Reykvíkingum? Trúlega er mesta þekking á Evrópusamstarfi sem þó er fyrir hendi saman komin á suð-vestur horninu. En ESB-aðild kemur öllum Íslendingum við hvar sem þeir búa á landinu. Þeir munu allir taka lokaákvörðun. Fiskvinnslukona á Raufarhöfn hefur jafnmikið atkvæðavægi og dósent við HÍ.

Evrópusambandið hefur fullan rétt til að kynna sjálft sig og eigin starfsemi, alveg burtséð frá því hvort Ísland verður nokkurn tíma aðili að því. ESB er til og hefur verið í 60 ár. Miðað við íslenska umræðuhefð er þó því miður sífellt ólíklegra að takist að koma að skynsemdarorði. Ef setja á lögbann á áróður setjum þá lögbann á misnotkun skattfjár í áróðursskyni í Bændablaðinu og setjum Moggann á hausinn eins og hann er réttilega. Í hann er eins og við vitum dælt áróðursfé frá LÍÚ. Þann áróður kostar almenningur fyrst kvótagreifum var gefinn fiskurinn í sjónum. Hvenær ætlar einhver að tala fyrir almannahagsmunir, fyrir neytendur í landinu og segja sérhagsmunaseggjunum að róa sig?

Erlend stjórnvöld kosti ekki áróður

Er þetta lýðræðisást Hjörleifs?

Í stjórnarsáttmála Samfylkingar og Vinstri Grænna er tekið fram að kjósendur muni samþykkja eða hafna aðaldarsamningi Íslands við Evrópusambandið þegar hann liggur fyrir. Fyrir síðustu kosningar höfðu bæði Borgarahreyfing og Framsóknarflokkur aðildarumsókn á stefnuskrá; í Sjálfstæðisflokki voru margir í forystu flokksins mjög jákvæðir fyrir umsókn. Það er því alrangt að umsóknin sé eitthvert einkamál Samfylkingar. Afstaða flokkanna sem lentu í stjórnarandstöðu eftir kosningar sýna hins vegar sorglega tilhneygingu til tækifærismennsku í íslenskri pólitík. Hvað er svo lýðræðislegra en að leggja niðurstöðu samninga í dóm kjósenda (sem nóta bene var ekki gert þegar landið gekk í NATO, Sameinuðu þjóðirnar, Norðurlandaráð, OECD, EFTA, EES o.s.frv.). "En til þess mun ekki koma". Hinn DDR (Austur Þýskaland) menntaði Hjörleifur vill taka kosningaréttinn af íslenskum kjósendum  í þessu máli. Í kommúnismanum átti upplýst sella að leiða óupplýstan lýðinn til hinnar leiftrandi kommúnísku framtíðar. Merkilegt að Hjörleifur og Ragnar Arnalds skuli nú vera samstarfsmenn Björns Bjarnasonar og Styrmis Gunnarssonar! Hvernig ætli þeirra lýðræðishugmyndir séu?

Utanríkisráðherra í hlutverki loddara

Sannleikanum verður hver sárreiðastur.

Allir sem eitthvað hafa fylgst með málum Belgíu síðustu árin vita að kóngur hefur lög að mæla og það er síst ofsagt að hætta sé á uppgangi fasista í landinu. Í seinni heimsstyrjöld var flæmska fasistahreyfingin mjög sterk. Nasistum tókst að sannfæra marga Flama um að þeir væru einhvers konar eðalaríar. Þeim þótti skjallið gott og voru enda duglegir við að benda á óaríska samlanda sína, Gyðingana í Antwerpen t.d. Hegðun margra Flama gagnvart frönskumælandi samlöndum sínum síðustu áratugi líkist æ meir hreinum fasisma. Fólki er bannað að kaupa fasteignir í mörgum flæmskum sveitarfélögum nema að geta sannað að það hafi "djúpstæð tengsl" við bæinn; les að það sé flæmskumælandi Flamar. (Ath. flæmska er í raun sama mál og hollenska, að framburði og einstaka orðum undanteknum). Kosningaplaköt á frönsku eru rifin niður í bæjum þar sem 95% íbúa eru frönskumælandi, en sem liggja á landi sem skilgreint er sem flæmskt, (oftast úthverfi Brussel). Í þessum bæjum verða borgarfulltrúar að tala flæmsku á fundum, þó móðurmál þeirra allra sé franska, og bæjarstarfsmönnum er bannað að svara á öðru máli en flæmsku ef einhverju erindi er beint til þeirra (neyðarhringingu t.d.). Öll vegaskilti, borgarnöfn o.s.frv. eru eingöngu á flæmsku, jafnvel þar sem þetta getur valdið ruglingi og erfiðleikum, (vallónska borgin Mons heitir t.d. Bergen á flæmsku og í Flandern vísa vegvísar eingöngu til Bergen en ekki til Mons). Þetta ófremdarástand hefur fengið að viðgangast allt of lengi og það er furðulegt hve litla athygli það vekur utan Belgíu (og Frakklands). Grundvallar borgararéttindi helmings belgísku þjóðarinnar eru fótum troðin af öfgaöflum í því landi þar sem Evrópusambandið (sem stefnir þó að friðsamlegri samvinnu þjóðanna) hefur sínar helstu stofnanir.

Varaði við uppgangi fasisma í kreppunni

Við segjum Búrgúndahérað, ekki Burgundy.

Í fréttamiðli sem nú hefur tekið upp þann sið að afskræma erlend staðarnöfn sem notuð hafa verið áratugum saman í íslensku (Chile og Bangladesh t.d.) er varla til of mikils mælst að haldið sé í aldagamlar íslenskar orðmyndir. Við höfum alltaf skrifað og talað um vínræktarhéraðið Búrgund eða Búrgundahérað. Að Englendingar kalli héraðið Burgundy kemur okkur ekkert við. Það væri þá nær að nota franska nafnið Bourgogne sem kemur reyndar fyrir í fréttinni, þó að fréttaskrifari haldi greinilega í fávisku sinni að það nafn sé hluti af nafni stúlkunnar!

Varðandi innihaldið sýnist mér þó að vinningshafi síðasta árs frá franska landsvæðinu Tahiti sé ágætlega sólbrún og skil því ekki hvað verið er að kvarta þó stúlka af evrópskum uppruna vinni í ár. Hvað yrði sagt ef hún hefði líkst íslenskri ljósku?

Segja fegurðardrottninguna „hvíta sem mjöll“