Sannleikanum verður hver sárreiðastur.

Allir sem eitthvað hafa fylgst með málum Belgíu síðustu árin vita að kóngur hefur lög að mæla og það er síst ofsagt að hætta sé á uppgangi fasista í landinu. Í seinni heimsstyrjöld var flæmska fasistahreyfingin mjög sterk. Nasistum tókst að sannfæra marga Flama um að þeir væru einhvers konar eðalaríar. Þeim þótti skjallið gott og voru enda duglegir við að benda á óaríska samlanda sína, Gyðingana í Antwerpen t.d. Hegðun margra Flama gagnvart frönskumælandi samlöndum sínum síðustu áratugi líkist æ meir hreinum fasisma. Fólki er bannað að kaupa fasteignir í mörgum flæmskum sveitarfélögum nema að geta sannað að það hafi "djúpstæð tengsl" við bæinn; les að það sé flæmskumælandi Flamar. (Ath. flæmska er í raun sama mál og hollenska, að framburði og einstaka orðum undanteknum). Kosningaplaköt á frönsku eru rifin niður í bæjum þar sem 95% íbúa eru frönskumælandi, en sem liggja á landi sem skilgreint er sem flæmskt, (oftast úthverfi Brussel). Í þessum bæjum verða borgarfulltrúar að tala flæmsku á fundum, þó móðurmál þeirra allra sé franska, og bæjarstarfsmönnum er bannað að svara á öðru máli en flæmsku ef einhverju erindi er beint til þeirra (neyðarhringingu t.d.). Öll vegaskilti, borgarnöfn o.s.frv. eru eingöngu á flæmsku, jafnvel þar sem þetta getur valdið ruglingi og erfiðleikum, (vallónska borgin Mons heitir t.d. Bergen á flæmsku og í Flandern vísa vegvísar eingöngu til Bergen en ekki til Mons). Þetta ófremdarástand hefur fengið að viðgangast allt of lengi og það er furðulegt hve litla athygli það vekur utan Belgíu (og Frakklands). Grundvallar borgararéttindi helmings belgísku þjóðarinnar eru fótum troðin af öfgaöflum í því landi þar sem Evrópusambandið (sem stefnir þó að friðsamlegri samvinnu þjóðanna) hefur sínar helstu stofnanir.

Varaði við uppgangi fasisma í kreppunni

Hertakið okkur!

Athyglisvert að frjálsir, sjálfstæðir og fullvalda borgarar hins Miðafríska Lýðveldis skuli ganga um götur brjótandi og bramlandi til að mótmæla því að gamla nýlenduveldið skuli vera hætt að skipta sér af öllum þeirra málum. Nicholas Sarkozy hafði heitið því að binda endi á "ný-nýlendustefnuna", (le néocolonialisme), einnig þekkt sem "Franceafrique". Þessi stefnubreyting virðist ekki hugnast öllum sem hennar eiga að njóta. Menn hrópa: komið aftur og stjórnið okkur! Kannski dálítið líkt viðbrögðunum hjá sumum þegar Kaninn yfirgaf okkur árið 2006?

Hermenn verja sendiráð

Við segjum Búrgúndahérað, ekki Burgundy.

Í fréttamiðli sem nú hefur tekið upp þann sið að afskræma erlend staðarnöfn sem notuð hafa verið áratugum saman í íslensku (Chile og Bangladesh t.d.) er varla til of mikils mælst að haldið sé í aldagamlar íslenskar orðmyndir. Við höfum alltaf skrifað og talað um vínræktarhéraðið Búrgund eða Búrgundahérað. Að Englendingar kalli héraðið Burgundy kemur okkur ekkert við. Það væri þá nær að nota franska nafnið Bourgogne sem kemur reyndar fyrir í fréttinni, þó að fréttaskrifari haldi greinilega í fávisku sinni að það nafn sé hluti af nafni stúlkunnar!

Varðandi innihaldið sýnist mér þó að vinningshafi síðasta árs frá franska landsvæðinu Tahiti sé ágætlega sólbrún og skil því ekki hvað verið er að kvarta þó stúlka af evrópskum uppruna vinni í ár. Hvað yrði sagt ef hún hefði líkst íslenskri ljósku?

Segja fegurðardrottninguna „hvíta sem mjöll“

Og hvernig er franska Obama?

Dæmigert að það virðist þykja sjálfsagt að allir jarðarbúar kunni fullkomna ensku, en enskumælandi gera sjálfir ekkert til að læra önnur mál. Kallast þetta ekki að kasta steinum úr glerhúsi (eða hvernig orðaði Vigdís Hauksdóttir þetta aftur?).

Guð gefi að Talibanar nái ekki aftur völdum.

Vonandi hafa menn tekið ljósmyndir og afsteypur af öllum mununum. Hafa allir gleymt því hvernig talíbanar umgengust fornminjar sem þeir töldu óguðlegar (þar eð þær voru eldri en íslam!)? Þeir sprengdu hinar heimsfrægu Búddastyttur í Banjam og "menningarmálaráðherra" þeirra mætti sjálfur með sleggju ! í þjóðminjasafn landsins og mölvaði mörgþúsund ára gamlar styttur og aðra ómetanlega gripi. Nú bendir allt til þess að þessir vitfirringar verði einir við stjórn eftir örfá ár. Þegar Danir skiluðu okkur miðaldahandritunum gerðu þeir það í trausti þess að við værum fær um að varðveita þau eins og best er á kosið og veita fræðimönnum aðgengi að þeim. Er sú varðveisla eins góð og hún getur orðið? Vonandi. Sama gildir um Kabúl. En mikið virðast menn vera bjartsýnir.

Forngripirnir heim til Kabúl

Eru sumarstarfsmenn mbl. ekki læsir?

Í fréttinni kemur skýrt fram að 57% þýskra kvenna kjósi heldur sjónvarp en kynlíf. Kannski skiljanlegt þegar maður veit að þær hafa úr hundruðum rása að velja í sjónvarpi, en kannski bara einum leiðindagaur fyrir "hitt". Sjálfsagt fá mbl. menn fleiri "hitt" út á kynlífið en sjónvarp. Nema þeir séu virkilega svona tregir.

Völdu sjónvarp fram yfir kynlíf

Skotinn fyrir poppkornsát.

Málið er hræðilegt og þetta er sannarlega ekki til eftirbreytni. En hefur aldrei hvarflað að neinum í íslensku bíói að gera eitthvað svipað?

Skaut bíógest vegna deilna um poppkorn

"Evrusvæðið er mikilvægasta markaðssvæði okkar".

Vinstri- og hægri vaktir ýmiss konar halda því að mönnum að Evrópa skipti engu máli, þar sé allt á hausnum o.s.fr. Við eigum því að versla við Ameríku, Kína,  Brasilíu og guð má vita hvað. En:

Sumir virðast endilega vilja gleyma því að Kaninn yfirgaf okkur ein og varnarlaus hér á skerinu árið 2006 og DO, Björn Bjarna og Styrmir stóðu grátklökkir eftir. Mestalla 20. öld höfðum við sérkjör við Engilsaxa, sérstaklega BNA vegna hernaðarlegs mikilvægis í heimsstyrjöldunum og síðan í Kalda stríðinu. Amerískir markaðir voru galopnir fyrir íslensk fyrirtæki, auk þess sem Íslendingar fengu alls konar sposlur sem öðrum stóðu ekki til boða. Flestir diplómatar virðast hafa litið á eyjarskeggja sem dekurbörn, en þeir borguðu samt þar sem þeir töldu að svo mikið væri í húfi fyrir BNA sjálf. Bandaríkjamenn hafa enga ástæðu til að veita okkur einhver sérkjör núna (sumir eru að vona að Norðurhjaramál geri okkur aftur spennandi, en það gæti orðið langt í það). Auðvitað er frábært ef mönnum tekst að halda stöðu sinni í N.-Ameríku. En hvað varð um íslensku sjávarútvegsfyrirtækin þar? (Coldwater o.s.frv.).

En burtséð frá því þurfa menn að sinna þeim mörkuðum sem þeir þekkja, sem þeir hafa einhverja menningarlega innsýn í, þar sem er hefð fyrir að menn vilja versla við okkur og sem ekki eru of langt í burtu. Menn geta þannig sinnt sínum erindum í Evrópu á einum degi og verið komnir heim um kvöld! Ekkert af þessu gildir um Brasilíu, Kína eða Indland, eins spennandi og þau þó eru.

Að síðustu: Danir hafa að vísu sína dönsku krónu, en hún er rígbundin við evruna (1.3% vikmörk!), eins og hún var áður bundin við þýska markið í áratugi. Hagfræðingur frá London School of Economics sem oft hefur komið hingað orðaði þetta ágætlega:" Evran er gjaldmiðill Dana, en þeir kjósa að kalla hana danska krónu!"

Kröftugri útflutningur en spáð var

HJÁLP! ESB vill kynna sig á Akureyri!

"Hvað skyldu "JÁ" sinnar segja ef "NEI" sinnar væru að opna stofur hér og þar til að kynna fólki efni og innihalds ESB samningsins..???": þetta er ein af furðulegum athugasemdum í tengslum við opnun upplýsingastofu um Evrópumál á Akureyri. Samningur liggur ekki fyrir. Hins vegar er alla daga rekinn hræðsluáróður gegn ESB og þeim þjóðum sem þar starfa saman í Mogga, Útvarpi Sögu og Bændablaðinu. Moggalygin kostuð af LÍÚ-mafíunni en Bændablaðinu stýrt af landbúnaðarmafíu fyrir fé skattgreiðenda. Hvað ætli nei-sinnar segðu ef til stæði að læða landinu inn í þetta samband án upplýsinga eða umræðu? En þegar reynt er að koma staðreyndum til skila er gargað: landráð, þjóðníðingar, heimsendir! Og koma Evrópumál ekki öðrum við en Reykvíkingum?

Evrópusambandið hefur fullan rétt til að kynna sjálft sig og eigin starfsemi, alveg burtséð frá því hvort Ísland verður nokkurn tíma aðili að því. ESB er til og hefur verið í 60 ár. Miðað við íslenska umræðuhefð er sífellt ólíklegra að takist að koma að skynsemdarorði. Kannski ætti enginn sem er vel við Evrópu að óska álfunni svo ills að fá hina sjálfumglöðu og vanþroskuðu eyjarskeggja innanborðs!

Samy, 7.5.2012 kl. 21:18

Var Þorláksbúðarhörmungin ekki nægileg?

Eru engin takmörk fyrir ruglinu sem mönnum dettur í hug? Ætlar Árni Johnsen að stjórna þessari aðför að Skálholti, eins og þeirri fyrri? Í Evrópu geta menn séð alvöru miðaldadómkirkjur. Eru virkilega einhverjir svo skyni skroppnir, að þeir haldi að fólk komi hingað á hjara veraldar til að sjá plastmiðaldir? Skálholt er merkilegur staður eins og hann er. Þar er ein besta samhangandi byggð kirkju- og skólabygginga í módernískum stíl sem þetta land hefur upp á að bjóða. Á að leyfa skurðgröfufíflunum að eyðileggja þetta eins og flest annað hér á landi?

Bygging miðaldakirkju í farvegi